Vieiros

O conselleiro vasco do Interior, Javier Balza, asegurou este xoves que o departamento que dirixe e o seu homónimo español están en "alerta máxima" tras a detención nas pasadas horas de dez presuntos membros da ETA, e ante a hipótese "moi real" de que esta organización "estea a tratar de reconstruír os seus comandos para actuar".

Nunha conferencia de prensa no parlamento vasco, o conselleiro considerou que os resultados das operacións policiais que se están a levar a cabo fan pensar que a ETA "non está disposta a dar moitas oportunidades a un proceso real de paz", ou que están a actuar "con dúas barallas".

Máis comandos
Balza, que mantivo na mañá do xoves unha conversación co ministro do Interior español, Alfredo Pérez Rubalcaba, amosou a súa "absoluta preocupación" pola situación actual, e salientou que cómpre traballar coa posibilidade de que poidan existir máis comandos da ETA.