Vieiros

Puidemos escoitar este tema na primeira edición de 'A polo ghit!' As contaxiosas ganas de festa que nos transmitían Malvela c'O Pirimpinpín volven este verán coa presentación do seu terceiro disco: xa venderon máis de 10.000 exemplares cos dous primeiros albumes (no 2004 sacaron o disco de nadal O aghinaldo, e xa antes, Que o pano non me namora, no outono do 2002). Agora, o grupo de cantareiras tradicionais presenta da miña xanela á túa, editado por PAI Música. Gravouse nos estudios Casa de Tolos, coa produción de Segundo Grandío e Uxía Senlle, quen foi ademais a madriña do grupo (eran as súas alumnas de canto nun curso na Asociación de Mulleres Rurais de Mos).

da miña xanela á túa consta dun cedé de 15 cancións (entre elas, como non, o "ghit" O Pirimpimpín) e dun deuvedé con dous vídeo clips, un documental, e un "como se fixo". No cedé, ademais de escoitar a estas señoras de Sanguiñeda (a señora Carmen, Matilde, Silvina, Fita, Clara, Dorinda e Carmiña (nai, avoa e filla da mesma familia), Carmen de Isaías, Isolina, Maruxa de Ramilo, Aurita, Dina, Teresa do Piñeiro, Merchi, Julia e Adela), hai convidados de luxo, como a propia Uxía, o Orfeón Treixadura, a Charanga O Fiadeiro, Lorenzo Suárez, Oli Giráldez, Luís Caruncho, Fernando Abreu, Sérgio Tannus, ou Augusto "Canario".