Vieiros

O Diario Oficial de Galicia publica hoxe un concurso polo que a Xunta busca un sistema de tradución automático do galego ao castelán, do galego ao inglés e do inglés ao galego. O sistema será publicado na rede, polo que os cidadáns poderano empregar de xeito gratuíto.

Agora mesmo en internet están dispoñibles sistemas de tradución de balde entre galego,castelán e outras linguas peninsulares; pero non entre galego e inglés, idioma dominante no ciberespazo.

Será propiedade da Xunta
A secretaría xeral de Política Lingüística gastará case 300.000 euros no tradutor, que ademais de texto, será quen de traballar con páxinas web e documentos con formato DOC, RTF, XML e ODT; entre outros. Nos requirimentos do concurso non se especifica que o software terá que ser de código aberto, pero, en todo caso, “o sistema pasará a ser propiedade da Xunta”, segundo explica un voceiro da Xunta.

Dicionario galego-portugués
Ademais, Política Lingüística abriu outro concurso para a “publicar na internet un dicionario de galego con correspondencias en castelán, portugués e inglés” no que investirá máis de 60.000 euros. As empresas interesadas en presentar ofertas a calquera dos dous concursos unicamente teñen quince días para facelo, ata o próximo 25 de setembro.