Vieiros

O Goberno vaille requirir ao Executivo español que se declare incompetente para conceder autorizacións de parques eólicos nas costas galegas. Así o decidiu este xoves na xuntanza semanal do Consello da Xunta.

Segundo o Executivo, o Real Decreto 1028/2007 -que estabelece o procedemento administrativo para a tramitación das solicitudes de autorización de xeración eléctrica no mar territorial- non respecta o marco competencial neste aspecto, xa que incumpre os artigos 27.13 do Estatuto de Autonomía e 149.1.22 da constitución española.

O Goberno, que se suma deste xeito á iniciativa presentada polo senador Francisco Jorquera (BNG) o pasado 11 de setembro na Cámara Alta, lembra que o Real Decreto xa advirte na súa exposición de motivos de que con esta regulamentación se procede a unha nova redistribución de competencias entre o Estado e as comunidades autónomas.

Situación e potencia mínima
O executivo español reclama estas competencias para si, baseándose na situación destas instalacións -no mar territorial- e nun criterio técnico que obriga que a potencia instalada mínima nos parques mariños sexa superior a 50 MW -a norma estabelece que o Estado terá a competencia sobre todos os que superen esta potencia.

O Goberno entende que nin a situación no mar territorial nin o estabelecemento dunha potencia mínima son criterios constitucionais de distribución de competencias entre o Estado e as comunidades autónomas, en base a varias sentenzas previas do Tribunal Constitucional.