Vieiros

No segundo plano en canto ás prioridades internacionais, segundo o roteiro actual, Darfur verá outra vez nos próximos meses como os compromisos estabelecidos cara á solución do problema son outra vez incumpridos.

Esta semana, un alto mando das forzas nixerianas que están na zona baixo o mando da Unión Africana advertía do problema, sinalando que en canto ao despregue dos soldados que deberían garantir o control dos enfrontamentos na zona, apenas un terzo dos necesarios estarán aló en xaneiro.

O pasado mes de agosto, o acordo votado por unanimidade no Consello de Seguridade da ONU autorizaba as accións necesarias, incluída a "forza" de ser necesaria para a prevención de ataques, protección da poboación, mellora da seguridade, reparto de axuda humanitaria e despregue do Acordo de Paz para Darfur. Daquela, o secretario xeral das Nacións Unidas, Ban Ki-Moon, dixera confirar en que este sería un paso decisivo para pechar "un capítulo tráxico na historia africana" que deixou xa centos de miles de mortos e máis de dous millóns de desprazados dos seus fogares.

O confito de Darfur agrava ademais outras crises próximas, coma é o caso da que sofre a República Centroafricana, a onde foxen milleiros de persoas desde Darfur que enchen campos de refuxiados neste país.