Vieiros

"O himno é o canto da Galiza que se sente responsable do seu porvir", reflexionou Anxo Quintana este sábado, coincidindo cos actos que na Habana recordarán a estrea hai cen anos do himno galego. O vicepresidente falou dos versos de Pondal e a música de Pascual Veiga como referentes sobre os cales o pobo galego pode unirse na reclamación da súa "personalidade nacional". "A bandeira e o himno son os símbolos que representan a Galiza no mundo, representan oficialmente ás galegas e aos galegos", observou Quintana.

Ao fío deste cen aniversario da primeira vez que se interpretou en público o himno do país, en 1907 na capital de Cuba, o vicepresidente da Xunta quixo evocar os tempos en que a sociedade galega "comezou a recoñecerse como suxeito de dereitos políticos" e botou man de símbolos de "identidade". Así, Quintana chamou a seguir o camiño na ampliación das "capacidades soberanas para construír un novo espazo de cidadanía que nos permita o exercicio real dos nosos dereitos; así asegurar a normalización da nosa cultura e da lingua galega, para desenvolver o potencial da nosa economía como garante de benestar, igualdade e solidariedade".