Vieiros

Luisa Elena González Perdomo, filla maior da retida polas Fuerzas Armadas Revolucionarias de Colombia-Ejército del Pueblo (Farc-Ep), dixo á prensa a tarde deste xoves que teñen "toda a confianza en que a operación continúa e estaremos á espreita dos seus resultados".

Informou que permanecerán en Caracas "o maior tempo que poidamos e, se temos que voltar a Colombia, se a entrega non concretara, estaremos agardando, desde alá, e faremos todo o posíbel para que regresen esas persoas e todas as demais", asegurou.

O posíbel fracaso da operación

A moza foi consultada verbo a hipótese, divulgada o 31 de decembro pasado polo presidente Álvaro Uribe Vélez, da posibilidade de que Emmanuel puidese estar en Bogotá nun Centro de Menores do Estado colombiano.

"Caeunos con moitísima angustia porque non sabiamos que acontecía. O Goberno colombiano presentaba unha hipótese sen un resultado e ao facelo xusto nese momento, xerounos moita tristeza e dor", afirmou.

Operación Enmanuel

Despois que o presidente de Colombia, Álvaro Uribe Vélez, sinalase que posibelmente as Farc-Ep non teñen ao fillo de Clara Rojas, Emmanuel, e que por iso non entregaran aos tres retidos que prometeran, testemuños de ex reféns deste grupo armado poñen en dúbida as súas afirmacións.

William Johany Domínguez, un soldado retido polas Farc-Ep en febreiro de 2007, asegurou nun vídeo de supervivencia que coñecía a Emmanuel e que camiñou en "dúas marchas" pola selva xunto á súa nai e á ex candidata presidencial, Ingrid Betancourt.

"Atopeime dentro do campamento onde hai máis prisioneiros de guerra e incluso hai uns políticos retidos, como é o caso da doutora Ingrid (Betancourt), a señora Clara (Rojas) e un neno que sempre anda con elas para todos lados (...) Iso era para min moi estraño, pois o tempo que levo aquí, nunca vin un neno e nesa oportunidade puiden velo. Ten moitos xoguetes que lle fan os guerrilleiros e gústalle xogar moito con eles, pero máis que todo sempre anda coas señoras (Ingrid e Clara) para todos lados (...) tiven a oportunidade de estar en dúas marchas con elas. Cando a señora cansa de cargar ao neno un guerrilleiro ofrécese amabelmente a axudarlle e isto gústalle moito a el, pois lle gusta xogar moito ao cabaliño. Malia que non nos deixan achegarnos moito a eles quixen algún día achegarme para falar con ela. Pero isto foi imposíbel xa que nos teñen moi distantes", relataba Domínguez este mesmo ano. Estas declaracións contrastan coa teoría de Uribe que fala dunha separación de Clara Rojas e o seu fillo Emmanuel desde 2005. No seu discurso, Uribe tamén asegurou que o neno fora torturado e que tiña múltiples problemas de saúde. "O neno ten afectado un brazo, ten cicatrices de tortura. Cando o sub intendente Pinchao fuxiu do seu cativerio contou que o neno Emmanuel tiña afectado un brazo e sufrira malos tratos, torturas, e que tiña queimaduras en todo o seu corpo", dixo Uribe o luns pasado.

Pinchao: Emmanuel atopábase "moi saudábel"


John Pinchao, un sub intendente que logrou escapar das Farc-Ep en abril de 2007, logo de oito anos e medio de cativerio, asegura que Emmanuel atopábase "moi saudábel".

"Están no campamento que lles comentei das dúas casas. Aí naceu o neno e eu tiven a oportunidade de alzalo nos meus brazos e despois, xa na marcha, medrara un pouquiño máis, tiña como un ano, penso, máis ou menos (...) moi saudábel", explicou.

A hipótese do goberno colombiano é verificada actualmente mediante probas de ADN, aínda que o proceso de obtención de mostras e o anuncio de resultados dentro de dúas semanas, xa xerou serios cuestionamientos.

Goberno puido realizar verificación xenética dous días antes de lanzar hipóteses

O investigador Emilio Yunis, o xenetista máis respectado de Colombia, afirmou ao xornal El Tempo que o Goberno colombiano tivo suficiente tempo para estabelecer se o neno Juan David Gómez Tapiero é fillo de Clara Rojas ou non, antes de dar a coñecer publicamente a hipótese.

"Os procesos de identificación por ADN duran unhas poucas horas, así que dous días serían máis que suficientes se se optou por algunha das diversas alternativas dispoñíbeis", asegurou o doutor Yunis.

O xenetista sinala que, para ofrecer altos niveis de confiabilidade, as probas deben realizarse baixo estritos parámetros científicos e xurídicos, o cal implica que desde a toma das mostras deben practicarse en sitios especializados e cos equipamentos axeitados.