Vieiros

Os dous irmáns, de Viveiro, gañaron o campionato galego de pentatlón moderno que se desenvolveu esta fin de semana en Lugo.

Cristóbal Rodríguez conseguiu, no mesmo día, o título de Campión Galego en categoría cadete e en xuvenís, despois dunha xornada que comezaba cedo de mañá coa proba de tiro no pavillón municipal da Duquesa, e que terminaba ás sete da tarde cos tres mil metros de carreira a pé. O viveirense é tamén o actual campión cadete e subcampión júnior do Estado.

A xornada non foi moi doada para Cristóbal, posto que tivo que pelexar duro contra Garrido e Torian. Finalmente, conseguiu o título ao vencer en tiro e en esgrima.

Polo seu lado, a súa irmá Yolanda conseguiu gañar o mesmo título na categoría benxamín, o segundo que consegue, despois de vencer en natación e no tiro, sendo terceira na carreira a pé.