Vieiros

Estabelecer porcentaxes máximas de alumnos en prácticas sobre o total do cadro de persoal da empresa ou habilitar canles de negociación para a conversión en contratos das prácticas son algunhas das reclamacións que forman parte da campaña do sindicato CCOO-Galicia.

Segundo explicaron esta semana no lanzamento da iniciativa a secretaria confederal de Xuventude, Nuria Rico, e o secretario de Xuventude de CCOO en Galiza, Melchor Roel, o sindicato elaborou un informe onde se pon de manifesto a realidade de milleiros de mozos que en todo o Estado fan prácticas formativas irregularmente utilizadas polas empresas.

Na opinión do sindicato, é necesario garantir o dereito de información da representación legal dos traballadores antes do comezo das prácticas e deben estabelecerse canles claros de contratación no caso de persoas xa tituladas. O obxectivo é frear a cobertura de postos de traballo a través de supostas bolsas de formación.