Vieiros

Unha nova web, T-incluye, ofrecerá unha ferramenta en liña para analizar se a linguaxe dos sitios da internet é sexista. Ademais, ofrecerá alternativas a esas expresións. Aínda que o servizo non está dispoñíbel, espérase presentalo publicamente "en datas próximas".

A ferramenta está a ser creada pola Fundación CTIC, institución asturiana privada sen ánimo de lucro que conta co apoio do goberno do Principado e xestiona o proxecto "Web con Género". O seu obxectivo é promover actividades de desenvolvemento das Tecnoloxías da Información e da Comunicación en todos os campos para o fortalecemento da Sociedade da Información.

Até que non entre en funcionamento o analizador automático, a web do proxecto xa ofrece acceso a diversos recursos sobre linguaxe non sexista e mais a convocatoria do premio T-incluye, que recoñecerá as mellores prácticas de utilización de contidos non sexistas na internet.