Vieiros

O veterano nadador estadounidense Jason Lezak deulle emoción este luns a unha das probas estrela do día, o 4x100 libres na piscina olímpica. Lezak recibiu o último relevo dos seus compañeiros cunha desvantaxe de 59 centésimas de segundo, todo un mundo nunha proba como esta, e co desafío de baterse co poderoso e veloz Alain Bernard.

E foi no último momento, cando polo gordo dun pelo Lezak estirou o brazo para poñerlle o freo ao cronómetro en 3'08''24, seis centésimas antes que o seu rival francés. Atrás deles chegaron os representantes dos equipos de Australia, Italia, Suecia e Canadá. Unha fazaña que lle daba o ouro aos relevistas estadounidenses e que mantén viva a aspiración de Michael Phelps de superar a histórica cima de sete ouros de Mark Spitz en 1972.