Vieiros

Segundo informou o Consello Nacional de Seguridade de Xeorxia, as tropas rusas están a abandonar a cidade de Gori. Reporteiros da canle pública británica, BBC, presentes no lugar, confirmaron este movemento, que tamén se está a producir dende a localidade de Igoeti.

O repregamento de Rusia, anunciado esta cuarta feira polo presidente Dmitri Medvedev, contempla o estabelecemento de postos de control nunha zona neutral nos arredores da rexión separatista xeorxiana de Osetia do Sur, lugar cara a onde están a viaxar os soldados e tanques rusos. Tamén se crearán puntos idénticos na fronteira con Abkhazia.

Por outra banda, Anatoli Nogovitsin, número dous do Estado Maior ruso asegurou este venres que a frota rusa controla a totalidade do Mar Negro. Tamén confirmou que buques militares alemáns e españois entraron xa nas súas augas rumbo a Xeorxia, informan medios locais.

"Sorprende que se lles encomendase a fragatas e a outros buques de guerra o transporte de cargas humanitarias", sinalou Nogovitsin, que recordou que o conflito xa deu cabo e que é "cuestionábel" a necesidade de que buques da OTAN permanezan no Mar Negro

Advirten de novos ataques de tropas xeorxianas
O número dous do Estado Maior advertiu ademais de que unidades xeorxianas se están a concentrar na zona céntrica do país e a recuperar a súa capacidade combativa. Desenvolven "misións de exploración e preparativos para accións armadas na zona" fronteiriza con Osetia do Sur.