Vieiros

A contribución para "a existencia dun mundo máis pacífico e a fraternidade entre as nacións", e os esforzos feitos en diferentes continentes para a resolución de conflitos internacionais, están entre os argumentos expostos este venres polo xurado para explicar o Premio Nobel da Paz 2008 a Martti Ahtisaari. O ex presidente finlandés recibe así un recoñecemento para o que o seu nome xa soara en anos anteriores.

Entre os últimos traballos diplomáticos que protagonizou está o seu labor como enviado especial das Nacións Unidas nos Balcáns. Neste contexto foi o encargado de deseñar o plan de paz para a zona, incluída a recomendación da independencia, internacionalmente supervisada, de Cosova. Con todo, o galardón que recibe agora Ahtisaari fai mención tamén ás tarefas nas que, no ámbito da mediación internacional, o ex mandatario finlandés leva implicado arredor de tres décadas.