Vieiros

O Porto de Vigo será base a comezos de 2009 do primeiro buque anticontaminación que a Axencia Europea de Seguridade Marítima (EMSA) situará en Galiza. Foi anunciado este xoves por Bernd Bluhm, responsábel da área de preparación e resposta anticontaminación da EMSA. Bluhm opinou que os Estados membros da UE non poden por si sós facer fronte a catástrofes como a do Prestige e avogou por "xuntar recursos" de todos os países.

No mesmo sentido, o director executivo da axencia, Willen de Rutter, repasou as competencias deste órgano europeo e destacou o seu labor na prevención de vertidos e en vixilancia marítima. Recordou por exemplo que a EMSA puxo en funcionamento un sistema de vixilancia das costas por satélite para detectar vertidos e sentinazos mesmo polas noites.

O buque ten cunha capacidade de 1.500 metros cúbicos de recollida e almacenamento de vertidos, prestacións de alta velocidade e a posibilidade de estar operativo para unha nova carga en dúas horas. Anteriormente, o primeiro buque anticontaminación da UE que chegaba ao Estado Español, fora enviado a Andalucía. O novo barco con base en Vigo, deberá dar cobertura a un área que vai do Porto até Brest. A aínda pendente adaptación tecnolóxica do barco, que custará 3,5 millóns de euros, vaise facer nun estaleiro da ría de Vigo.