Vieiros

Entre setembro e novembro do pasado ano impartiuse por primeira vez os cursos Celga 1 e Celga 2 no Centro Galego de Barcelona (CGB) en colaboración coa Xunta de Galicia e seguindo a nova normativa que rexe a formación en lingua galega tanto en Galiza coma nas comunidades do exterior.

O alumnado que preparou no CGB o Celga 2 e se presentou ó exame oficial da Xunta superou a proba e en breve recibirán o certificado que así o acredita, o cal demostra a rigorosidade con que se imparten destes cursos neste Centro.

O nivel de coñecementos que se esixe para a superación do Celga 2 é o adecuado para que o poidan realizar moitos galegos e non galegos que viven en Barcelona e que queren ter un dominio desta lingua suficiente para comunicarse ou redactar un texto correctamente.

E así o demostra o feito de que inda que se ofertan outros cursos de distintos niveis nalgunhas das universidades desta cidade, o Celga 2 é o máis demandado.

Por outra parte, os interesados que superen os exames oficiais que a Xunta de Galiza realiza en Barcelona en maio e novembro recibirán un certificado de ter superado este nivel.
O Centro Galego de Barcelona está traballando para ser un referente da lingua e cultura galegas en Barcelona e mesmo en Catalunya e con esta finalidade oferta de novo este curso para todos aqueles que queiran adquirir coñecementos lingüíticos e culturais de Galiza.

Os datos máis salientables sobre o Celga 2 que se impartirá no CGB son:

Prazo de inscrición: desde o 27 de xaneiro ata o 12 de febreiro de 2009, enviando un correo a este enderezo do CGB ou chamando por teléfono ó 933012892 a partir das 17 h.

Calendario: do 15 de febreiro ó 30 de xuño de 2009.

Horario: luns e mércores de 19h a 21h.

Lugar: Aula de formación do Centro Galego de Barcelona, Rambla de Caputxins, 35.

Programa do curso: pódese consultar nesta web da Xunta de Galicia.

Prezo: gratuíto.

Exames oficiais (Vid. Diario Oficial de Galicia núm. 10 de 15 de xaneiro de 2009):

Maio: o exame será o 24. Prazo para inscribirse: ata o 25 de marzo.
Novembro: o exame será o 22 de novembro. Prazo para inscribirse: ata o 12 de outubro.

Taxas de exame: 15,61 €

Ademais do programa do curso publicado pola Xunta de Galiza, o CGB organiza outras actividades complementarias como charlas, visitas a museos, rutas urbanas ou camiñadas co fin de potenciar a oralidade e practicar este idioma fóra da aula.

Para calquera dúbida ou consulta, cómpre poñerse en contacto telefónico co CGB ou por correo electrónico.