Vieiros

• Mira aquí o Especial Entroido que publicou Vieiros da Escola hai un ano

Por Ourense levan un mes de festa, pero aínda quedan forzas para saír á rúa este martes de Entroido. En Laza, por exemplo, pola mañá saíron xa os 'peliqueiros veteráns'; pola tarde será o momento do desfile de carrozas, e a partir das sete virá o Testamento do Burro, o Enterro do Entroido e o Loito dos Peliqueiros. En Verín, o máis importante da xornada será o masivo desfile, que cada ano xunta a milleiros de persoas.

En Viana do Bolo o martes é o Día do Intruido, no que tamén se celebra un desfile, que precede á Queima dos Lardeiros, acompañados dunha Fulionada.

En Cobres (Vilaboa) ten lugar este martes a tradicional Corrida do Galo, do que mesmo se poden ver imaxes de como se celebraba nos anos setenta.

En Bande, é o tempo para a saída dos Troiteiros, mentres que en Vigo volveranse ver pola rúa os Merdeiros, recuperados o pasado ano.

Aínda quedará o Mércores de Cinza, o enterro da sardiña ou o enterro do Ravachol, por exemplo, aínda o venres. Pero unha vez que pasa o martes, ao Entroido quédalle pouca xolda. Xa di a cantiga: Adiós martes de entroido/ adiós, meu amiguiño/ hasta Domingo de Pascua/ non comerei máis touciño.