Vieiros

No momento de escribirmos estas liñas, Amor lexionario e Sexualidade asemblear son os últimos relato recibidos para o concurso de microrrelatos eróticos de Vieiros: Ferve a Rede: "Xuntos na Xunta, xuntamos ti e máis eu e máis tantos outros e outras. Que sexa o noso goberno a expresión do noso corpo social multipartidario", reza este último dos chegados.

Alén dos máis recentes, algúns dos máis votados polos internautas que andaron por estes pagos é Baronha, obra do usuario Suso: "A moça era fermosa como uma deusa, e estava núa (...)", comeza. Tamén Post-coito, de Snob, "Era cousa boa que deixaras de fumar - dixo ela, rexeitando o pitillo postcoital de rigor (...)". Perto deles no ránking dos lectores aparece Sabor extraño, "Ía facendo o meu percorrido polo parque de atraccións, subindo amodiño, amodiño, amodiño e baixando de súpeto pola montaña rusa, cando lle notei o gusto ise, extraño pero coñecido (...)".

Deica o 24 de abril aínda teñen tempo para procurar inspiración nestes días primaverais e espremeren imaxinación e literaturas. Agardamos as súas propostas para que a rede siga fervendo.