Vieiros

Axentes do Servizo de Protección da Natureza (Seprona) de Corcubión acusan a dous veciños de Dumbría de cometer un delito contra a flora e a fauna, por caza ilegal con lazos de aceiro. A acusación formalizouse despois dunha investigación levada a cabo coa colaboración da Consellaría de Medio Ambiente.

A Garda Civil tivo coñecemento dos feitos hai un mes cando atopou uns lazos de aceiro presuntamente utilizados para a caza ilegal. Poucos días despois atoparon dous xabaríns mortos, xunto a uns lazos idénticos aos primeiros. Os gardas decidiron desmontar os lazos e comezaron unha investigación que pouco despois daría os seus froitos.

Foi cando atoparon os lazos montados de novo cun xabarín e un lobo (especie especialmente protexida). Os axentes acusaron a dous habitantes da zona que atoparon nas inmediacións do lugar e están actualmente en liberdade con cargos.