Vieiros

A canle multinacional TeleSUR informou de que a primeira xornada de paro nacional en Honduras deixou como resultado polo menos un morto, sete detidos e varios desaparecidos, entre estes o alcalde de San Pedro Sula. O presidente imposto, Roberto Micheletti, ordenoulle ao Exército que reprimise as manifestacións en protesta polo golpe de Estado.

• Sinal en directo de TeleSUR

O presidente constitucional, Manuel Zelaya, declarou este luns (madrugada en Galiza) que regresará esta quinta feira ao país logo de que participe nunha reunión da Organización de Estados Americanos (OEA) en Washington (EUA).

Zelaya anunciou a súa volta na xuntanza extraordinaria da ALBA este luns en Managua (Nicaragua). "Vou para Tegucigalpa o vindeiro xoves, regreso de Washington, chega o presidente electo polo pobo", asegurou Zelaya.

Ademais, este martes, está previsto que suba á tribuna da Asemblea Xeral da ONU. Zelaya aproveitará a ocasión para agradecer a solidariedade mundial e a condena unánime da comunidade internacional ao golpe de Estado.