Vieiros

Namentres que en Durban, terceira cidade máis grande de Suráfrica e porto principal do país, aquelan o novo estadio de fútbol para o Mundial de fútbol de 2010, as autoridades están a desaloxar pola forza as favelas que impiden a súa construción.

Xa son milleiros os desprazados e moitos outros os ameazados co desafiuzamento. A fin de semana pasada, un grupo armado dunhas 40 persoas atacou un destes asentamentos en Durban, onde habitan moitos dos cidadáns máis pobres da cidade, e destruíu 30 choupanas.

• Entrevista con dous activistas sudáfricanos na canle estadounidense 'DN!'

Neste senso, os xefes policiais do país desvelaron nos últimos días unha serie de medidas destinadas a reducir a taxa de crimes -parella, por outra banda, á da de diferenza entre ricos e pobres- de cara ao evento futbolístico que comeza en menos de nove meses. A consigna, desde as máis altas instancias, é "tolerancia cero".

Segundo as últimas cifras, o número de asasinatos diarios descendeu tres décimas, mais aínda se mantén arredor das 50 mortes violentas por xornada, o que fai que Suráfrica sega a ser un dos países máis violentos do mundo, mais tamén -cómpre insistir- onde a distancia entre os que máis e os que menos teñen é maior.

• Máis información: Channel Africa | Mail & Guardian