Vieiros

O secretario de Organización do PSdeG, Ricardo Varela, confirmou este martes que os socialistas presentarán candidaturas nos 315 concellos galegos, e avanzou que teñen "practicamente ultimada" a elaboración das listas no conxunto do país.

En declaracións a Radio Lugo, Varela reivindicou que no caso concreto da provincia lucense trátase de "candidaturas moi renovadas", en máis dun 40%, e "moi pegadas aos municipios, con xente nova, con xente que coñece os problemas de cada concello".

Ourense dáse por perdida
O PSdeG aspira a gobernar en tres das catro deputacións; isto é, conservar a da Coruña e conquistar as de Pontevedra e Lugo; a de Ourense dáse por perdida. Os prognósticos sonlle favorábeis na primeira -sempre e cando se acade o decisivo voto da área metropolitana-, máis pesimistas na segunda -o factores 'Porro' e 'emigración' serán decisivos- e na última, aínda todo está por decidir.

Esta situación levou a unha intensa actividade nos municipios lucense dos dirixentes socialistas, especialmente dos seus dous secretarios de Organización, o nacional, Ricardo Varela, e o estatal, Xosé Blanco, para recabar apoios en toda a provincia, incluso en forma de 'fichaxes' de concelleiros independentes.

Ricardo Varela amosouse convencido de que o PSdeG "vai ter un respaldo amplo da poboación", se ben precisou que "non é amigo de facer quinielas" sobre o número de alcaldías que poden conseguir en Lugo, onde, na actualidade, ostentan un total de 14. Porén, precisou que o número de concelleiros aumentará nun 30%.