Vieiros

O alcalde de Pontevedra, o nacionalista Miguel Fernández Lores, situou nun "mes como moito" a marxe máxima para chegar a un pacto de gobernabilidade co PSOE, que lle garanta a maioría que non conta na actualidade.

"Antes dun mes hai que facer un pleno de organización e funcionamento, e é importante chegar a acordos", sinalou o alcalde tras precisar que en calquera caso "non depende solo dun senón dos dous". No mesmo sentido pronunciouse tamén a candidata socialista, Teresa Casal, quen precisou que, no que a ela respecta, demostrou dende o principio interese por chegar a un acordo e asegurou que o seguirá intentando pero "non a calquera prezo".

Tras constituír onte un goberno provisional en minoría, solo cos concelleiros do BNG, hoxe o alcalde realizou unha distribución de responsabilidades caracterizada polo mantemento das áreas que os concelleiros nacionalistas tiñan asignadas na anterior lexislatura. Deste xeito, a área de Urbanismo segue sendo responsabilidade de Cesar Mosquera, a concellaría que puido ser a maior causante da perda de votos do BNG, segundo recoñeceu o propio Fernández Lores a mesma noite electoral cando asegurou "tomar nota".