Vieiros

O patrón do atuneiro Praia de Bakio, o baionés Amadeo Álvarez, recoñeceu esta quinta feira tras unha breve comunicación cos seus familiares que non está "moi animado" con respecto á situación en que se atopan, "quizais porque xa pesan os cinco días de secuestro", atribuíron os familiares.

No entanto, sinalou que os 26 tripulantes do barco están "ben", e dixo que eran coñecedores de que o embaixador español en Quenia e encargado de Somalia está en Mogadiscio para negociar a súa liberación.

Por outra banda, o Reino Unido está a impulsar unha resolución no Consello de Seguridade da ONU que lle abriría a porta a unha maior presenza do organismo internacional na zona así como ao envío de cascos azuis -tal e como está a solicitar o goberno de transición somalí- para tratar de pórlle fin ao caos en que está sumido Somalia, informan axencias internacionais.